打針日 >0<

啱啱過咗一個開心的party後， 就輪到要打針見醫生喇！ 我已知打針後會好易發燒， 所以已替豆豆選打六合一針， 喺佢打針歷程可以打少六支。但同時預防針亦比以前多......所以豆豆今日都要打兩支及口服一支 >o<

成日比人話大件的豆豆，果言不負眾望體重已達6.89kg (15.16ibs)， 以100個BB做统計，他排Top 3......HaHa 而身高亦有60cm，他排Top 10。醫生亦好佩服呢個大BB。至於豆豆打針之表現亦十分之好，醫生話一支唔係太痛，另一支就比較酸麻，佢豆豆只叫一聲，就接受咗，姑娘都話勁！

打完針的他比較赲，夜晚開始可能針口有啲痛，所以有啲發脾氣，希望豆豆唔會發燒，可以瞓得好啦！

雙滿月之喜

豆豆兩個月之party...多謝很多親戚朋友來臨...

豆豆整晚表現相當好, 雖然無咗平日哈哈笑嘅樣, 亦無咗大人講一句, 佢又答一句的情況出現。但佢一直保持同一姿勢, 歡迎不同親友同佢合照, 真係值得一讚, 豆豆真係一個識social之小朋友, 任人摸, 任人抱, 都好少發脾氣, 個個親友亦對佢對粗壯手臂及大腿感到相當有興趣, 兩個月人仔就有15磅, 亦都嘆為觀止, 豆豆對住鏡頭亦總會眼定定, 完全交足功課。入席後, 大人進餐, 佢就食奶, 之后可能知冇人同佢玩喇! 仲charge咗一陣電, 到散席送客又識自己起身, 莫非佢真係知呢個係佢嘅party??? 返到屋企已11:00pm就發脾氣揾媽媽...揾到媽媽就好快瞓着到天光喇!

食手指 or 食奶嘴

本來很堅持唔想比豆豆食奶嘴，但睇見佢成日偷偷食手指，食唔到又喊，食到我又唔想，所以我唯有比奶嘴佢，總好過食細菌手指。

佢而家食住奶嘴，情緒比之前好好多，每次臨瞓前比佢食，不足五分鐘就瞓著，唔怪之得話係媽媽恩物啦！

而家市面買的叫安撫奶嘴，真係有意思！

人仔細細已食8oz奶

o my god...只有七星期大的豆豆，已差不多食8安士奶喇! 呢嗰樽

已到達max point。依照阿豆情况，唔通要飲2支???

老積仔-Part 2

豆豆已識得聽不同人的聲音，有時候我會覺得自己好似儍婆咁，每天跟他唱歌，傾計。見他不時作出反應，雖然只係哦哦，但已令我聽得好開心。小小的他見你講佢又講，實在太可愛喇！

老積仔-Part 1

只得個半月大的豆豆， 成日好似大人咁要企，要坐。佢嘅行同樣貌實在太老積喇! 好多人問我陀佢嗰陣係咪飲咗好多骨湯，哈哈! 係冇！

戒夜奶的第一天

本來並沒有咁早就戒夜奶的打算，但自從聽了某書某教授的意見後，就覺得阿豆六星期開始戒夜奶好似已係時候了。

每個人都有生活習慣，定時作息，一但生活模式已習慣，日後想改就更困難，新陳代謝都好D。

方法如下:

硬性調整佢d飲奶時間, 就係朝早第一餐開始計, 當你七點第一餐, 跟住之後就每三小時餵一次, 每次都要確保佢飽為止, 唔好俾佢飲少少就訓, 幾日後佢會慣左呢個生理時鐘, 即係7am, 10am, 1pm, 4pm, 7pm, 10pm, 3am, 時間未到就算佢喊都唔好餵佢, 過得幾日, 佢就會食埋最後果餐(10pm)就自動瞓過夜, 但切記就算佢朝早七點冇醒, 你要一定要七點餵佢, 唔好俾佢拖亂左d時間。

今日係試驗的第一天, 希望唔洗好多日就成功啦!

似邊個???

結果非常明顯......
豆豆簡直就係豆父......

洗白白

洗白白係豆豆每日最開心嘅時間， 任何肚餓,、 眼瞓產生之不安情緒，係呢嗰時候全部消失晒， 佢會好安靜、 認真地享受。

其實令佢咁享受主要係佢張私家沙灘椅，但看見豆豆每日長大，恐怕沙灘椅不能負荷太久喇! 到時又要揾啲乜嚟呢???